Runāsim  latgaliski!

Diskuseja “Latgalīšu volūda medejūs” Latvejis Nacionalajā bibliotekā

Par gūdu latgalīšu volūdys latiņu drukys aizlīguma atceļšonys godadīnai, kai ari sagaidūt Latgolys kongresa dīnu,  26. aprelī 11:00 stuņdēs Latgalīšu kulturys bīdreiba (LKB) sadarbeibā ar Latvejis Nacionalū biblioteku (LNB) reikoj diskuseju “Latgalīšu volūda medejūs”, kluotīnē LNB i tīšsaistē. Kluotīnē aicynuoti daleibai medeju politikys veiduotuoji i medeju puorstuovi,  tīšsaistē Latgolys kongresa sātyslopā diskusejai varēs sekuot i sovu vaicuojumu uzdūt sevkurs interesents.

23. aprelī 1904. godā tyka panuokts, ka atceļ latiņu drukys aizlīgumu Vitebskys guberņā, kur tūlaik beja Latgola. 26.–27. aprelī 1917. godā Rēzeknē nūtyka Latgolys kongress, kas pyrmū reizi aktualizieja ideju par sovys vaļsts izveiduošonu i pījēme lāmumu, ka Latgola ir gotova apsavīnuot ar Vydzemi i Kūrzemi, veidojūt Latvejis vaļsti. Latvejis vaļsts ideja pyrmū reizi izskaņ tīši Latgolys kongresā.

Diskusejis pamatideja – atkuortuoti izgleituot par latgalīšu volūdys statusa i funkcionalitatis vaicuojumim, analizēt medeju pīduovuojumu i vareibu Latgolā, jimūt vārā kai sarežgeitū geopolitiskū situaceju, tai aktualuokūs pietejumu datus par sabiedreibys nūtureibu, medeju patiereņu, volūdys izvieli i diskutēt par īrūbežuojumim, kas jūprūjom naļaun latgalīšu volūdai skanēt ziņu raidejumū kasdīnā, kai ari par īspiejom juos izmantuojumam, rysynojūt medejtelpys puormaiņu i sabīdreibys salīdiešonys  pasuokumus Latgolā.

Diskusejā pīsadaleis: Agris Bitāns, Latgolys kongresa lāmumu izpiļdis padūmis (LKLIP) prīšksādātuojs, Jānis Siksnis, SEPLP prīšksādātuojs, Sigita Roķe, LTV golvonuo redaktore, Ausma Sprukte-Kozule, LRT žurnaliste,  Karīna Bandere, LNB Digitaluos atteisteibys departamenta direktore, Arņs Slobažanins, radio i TV raidejumu vadeituojs i veiduotuojs, i režisors Vīsturs Kairišs. Taipoš diskusejā ir aicynuoti daleitīs ar sovu pīredzi eksperti, kas darbojās ar latgalistikys, t. sk., ari medeju vaicuojumim: Valters Ščerbinskis, Nacionaluos enciklopedejis golvonais redaktors,  Ināra Klekere, LNB bibliotekys ratumu zynuotuoja, i Snorre Karkonens-Svensons, Volūdu sātys dybynuotuojs, norveģu volūdys tulkuotuojs i pedagogs. Diskuseju vadeis žurnalists Ansis Bogustovs.

Pasuokumam kluotīnē var dasaceit da 24. apreļa ite: https://forms.gle/9UAWSRWu4FDcPbaX8

Pasuokumu organizej: Latgalīšu kulturys bīdreiba, LBTU Malnovys koledža i Latgolys kongresa lāmumu izpiļdis padūme (LKLIP) sadarbeibā ar Latvejis Nacionalū biblioteku.

Projektu” Latgalīšu kūpīnys lidereibys i pīdereibys styprynuošona, eistynojūt Latgolys kongresa idejis” finansiali atbolsta Sabīdreibys integracejis fonds nu Kulturys ministrejis dūtajim Latvejis vaļsts budžeta leidzeklim. Projekts teik realizāts nu 03.04.2022. da 31.10.2024.

Ilga Šuplinska,

                                                                                projekta koordinatore, LKB vadeituoja